طيب ايه اللى حصل من يومين.. الرئيس الروسى بوتن طلع للمجتمع الدولى وقالك الحق.. الجيش الأوكرانى ضرب نقطة حدودية فى روسيا.. وقام حاشد قوات روسية هجومية على الحدود مع أوكرانيا.. طيب ده معناه ايه؟.. معناه ان القوات الروسية الهجومية دى.. مع باقى المعدات العسكرية اللى روسيا حشدتها خلال الفترة اللى فاتت على حدود أوكرانيا.. مش فاضلهم غير جوز عساكر ويعلنوا الحرب.. طيب.. هل فى حاجه تانية حصلت؟.. أقولك أيوه.. خد الكبيرة والتقيله.. بوتن طلع فى التليفزيون قدام العالم كله.. وقام مطلع ورقه من جيبه.. فاردها على الطرابيزة اللى قدامه.. وموقع عليها.. خير يا فندم ايه الورقة دى؟.. بتوقع على ايه؟.. فابتسم قدام الكاميرات وقالك ده اعتراف روسي باستقلال جمهورية دونيتسك وجمهورية لوغانيسك.. استقلالهم عن مين ياريس؟.. عن أوكرانيا.. وهنا قبل ما أقولك مين دونيتسك ولوغانيسك دول.. أنا عايزك تغمض عنيك وتتخيل معايا اللى بيحصل.. حلف الناتو العسكري المكون من دول أوروبا معاهم أمريكا أقوى دولة فى العالم.. واقفين بيهددوا بوتن انه يقرب من أوكرانيا.. فيقوم بوتن مقسمها 3 دول وهو قاعد فى مكتبه.. بدون ما يضرب طلقه واحده.. غمضت عنيك؟.. اتخيلت؟.. تمام.. خلينى بقى أقولك مين دونيتسك ولوغانيسك دول.. دول منطقتين موجودين فى إقليم اسمه إقليم دونباس.. والإقليم ده موجود فى شرق أوكرانيا.. وشرق أوكرانيا ده يعنى على الحدود مع روسيا.. مش عايزك تتوه منى.. خلينا ماشيين واحده واحده.. انت عندك محافظة الجيزة.. فيها شارع الهرم وشارع فيصل.. صح كده؟.. هو ده الموضوع باختصار.. إقليم دونباس ده فيه منطقتين.. واحدة اسمها دونيتسك والتانية اسمها لوغانيسك.. لكن طبعا أكبر بكتير من الهرم وفيصل.. دول زى محافظتين كده.. اللى يهمك فى الموضوع انهم شرق أوكرانيا على الحدود مع روسيا.. طيب اشمعنا روسيا اعترفت باستقلال المنطقتين دول تحديدا؟.. لأن المنطقتين دول فيها قوات انفصالية.. قوات أوكرانية لكن انفصلت عن الحكومة الأوكرانية.. بيحبوا روسيا أكتر من أوكرانيا.. وهنا 3 أسئلة.. روسيا هتستفيد ايه لما تعترف باستقلالهم؟.. والسؤال التانى.. هما انفصلوا عن أوكرانيا ليه أصلا؟.. والسؤال التالت.. ازاى أوكرانيا سمحت بانفصالهم بسهوله كده؟.. هقولك.. روسيا هتستفيد ايه.. لأ هتستفيد كتير.. أولا تانى يوم اعترافها باستقلالهم ولما يتحولوا لدول بحكومات منفصلة.. هما نفسهم يقدروا يطلبوا دخول الجيش الروسي أراضيهم.. وبالتالى يبقى الجيش الروسيا دخل أوكرانيا بدون ما حد يقوله انت بتعمل ايه.. ثانيا انفصال المنطقتين دول بيزود مساحة الحدود الروسية تجاه أوكرانيا.. وبيقلل من قرب حلف الناتو لحدود روسيا.. ثالثا بيزود من سيطرة البحرية الروسية على جزيرة القرم اللى هى سبب المشكلة أصلا.. واللى شرحنا أهميتها فى حلقة عملية أبواب الجحيم للى حابب يرجعلها.. الاستفادة الرابعة والأهم انها وسيلة ضغط جديدة على حلف الناتو علشان يقبل مطالب روسيا بعدم الاقتراب من الحدود الروسية.. حلف الناتو عمال يقرب من الحدود الروسية لدرجة انه وصل لأوكرانيا وعاوز ينشر قواعد عسكرية على أراضيها.. فتقسيم أوكرانيا لـ 3 دول معناه انك مش بس هتحارب روسيا لوحدها.. ده انت دلوقتى هتحارب 3 دول.. روسيا و دونيتسك ولوغانيسك.. الاستفادة الخامسة ان حتى لو الحرب قامت فروسيا هتكون ضمنت انها خارج الأراضى الروسية.. الحرب هتكون جوه الأراضى الأوكرانية بين حكومة كييف عاصمة أوكرانيا.. والقوات الانفصالية فى دونيتسك ولوغانيسك.. ده طبعا بالإضافة للقوات الروسية اللى هتكون على أراضى دونيتسك ولوغانيسك.. الاستفادة السادسة والأخطر.. هى ان تقسيم أوكرانيا خطوة مينفعش ترجع فيها.. يعنى فى قرارات ينفع تقولها وانت بتزعق وفى نفس الوقت تقدر ترجع فيها.. زى مثلا والله لأقطع عنك المصروف.. والله لأحرمك من الميراث.. والله لفرض عليك عقوبات اقتصادية.. كل دى تهديدات ينفع ترجع فيها.. انما ان دولة تتقسم وتعترف بالدول الجديدة وتسلح قواتها الانفصالية.. فده مفيهوش رجوع.. خصوصا وان بوتن عمل حركة صايعه جدا.. من يوم ما وقع اتفاقية مينسك مع أوكرانيا.. منح 700 ألف مقاتل من القوات الانفصالية الجنسية الروسية.. يعنى القوات الانفصالية دى رسميا.. بقت قوات روسية مش أوكرانية خلاص.. حد من حضراتكم يقولى هى ايه اتفاقية مينسك دى؟.. هقولك لكن خلينا نكمل إجابات باقى الأسئلة الأول علشان تفهم خريطة كوكب الأرض الجديدة بقى شكلها ايه.. المصادر https://bit.ly/34WpCcF https://bit.ly/3s7IJsU https://bit.ly/3s7wmx0 https://bit.ly/3H7zOMj https://bit.ly/3LTsNm8 https://bit.ly/3BMW8Kf https://bit.ly/3v7q42h #المواطن_سعيد #غزو_اوكرانيا #روسيا_واوكرانيا